Nyuma y’uko kuwa Gatanu tariki ya 8 Mutarama, hamenyekanye inkuru y’akababaro ko Padri Ubald RUGIRANGONGA yitabye Imana, bamwe mu Bakirisitu Gaturika bagaragaje agahinda batewe n’uruppfu rwe, bavuga ko babuze umupadiri w’ingirakamaro kandi akaba yari na muganga w’imitima ya benshi.
Bamwe mu baganiriye n’ikinyamakuru Isezerano.com, bavuze ko Imana yamukunze kubarusha nubwo bafite agahinda. Bavuze ko ari urupfu rwababaje benshi, ndetse ngo usibye Abagaturika, n’abanyarwanda muri rusange barababaye.
Uyu witwa Olivier yagize ati” urupfu rwa Obald rwambabaje cyane, kuko yari umupadri w’intangarugero ikindi kandi akaba yafashaga Abanyarwanda bafite ibikomere ku mitima, mu gikorwa cy’isanamitima ndetse n’ubumwe n’ubwiyunge. Ntakindi namwifuriza usibye kuruhukira mu mahoro ibihe byose.”
Ibi kandi bikomeza byemeezwa batangaje ko usibye kuba babuze padiri,babuze n’umuganga w’imitima n’ibikomere bya benshi. Joseline nawe washyizweho ukuboko na Ubald muri iryo sengesho rye akabasha gukira indwara yagize ati “kuri njyewe urupfu rwa Padiri Ubald sinabona uko ndusobanura, kuko no kubivugaho ndumva biri kumbabaza. Gusa Imana imuhembere imirimo myiza yakoze akiri ku isi kuko yakoze ibyo Imana ishaka, ndetse yagaragaje ukwitanga muri byose, mwifurije kuruhukira mu mahoro.
Mugahinda kenshi Nyiricyubahiro Musenyeri Celestin NZAKAMWITA uyobora diyosezi ya Gikongoro na Cyangugu, yavuze ko Kiliziya n’Abanyarwanda muri rusange babuze umuntu w’ingenzi. Mu magambo ye yavuze ko yari umupadri mwiza kandi witangira ubutumwa bwe nkuko yabisezeranye ubwo yahabwaga ubusaseridoti, akaba yakundaga cyane ubutumwa bw’isanamitima, kuko nyuma ya Jenoside yakorewe Abatutsi mu 1994, yahise atangira iki gikorwa cy’isanamitima mu banyarwanda, abakangurira ubumwe n’ubwiyunge ndetse no gusaba imbabazi no kuzitanga.
Yagize ati” Padiri Rugirangoga, yari umupadiri witangira ubutumwa bwe kandi akagira umurava. Ikintu kitazasibangana mu mitima y’Abanyarwanda ni uko yakoreshaga isengesho indwara za benshi zigakira. Muri Diyosezi ya Cyangugu yari ashinzwe urugo rw’ibanga ry’Amahoro ndetse n’isanamitima, yaguze isambu ariko ayishyira mu biganza bya diyosezi ya Cyangugu.
Musenyeri Nzakamwita yakomeje asaba Abakirisitu n’Abanyarwanda muri rusange, kugira umutima wihangana ahubwo bakamusabira. Padri Rugirangoga Ubald yitabye Imana yari amaze imyaka irenga 32 ahawe ubusaseridoti, akaba atabarukiye muri leta zunze ubumwe za Amerika aho ahitanywe n’indwara y’ibihaha yari amaze iminsi arwaye.
Ntateze gusibangana mu mitima ya benshi nk’umupadri wakizaga indwara. Kugeza ubu Igihe cyo kumushyingura mu cyubahiro ntikiratangazwa.
