Bitewe nuko coronavirus yibasiye abatuye Isi, Ikigo cy’ubushakashatsi cy’Abanyamerika (Biotech) gikomeje ubushakashatsi ku rukingo rw’icyorezo cya COVID-19.
Biteganyijwe ko ubushakashatsi buzakomeza kugeza ku ya 27 Ukwakira 2020. Nibigaragara ko formule yatoranyijwe mu igerageza ry’ubushakashatsi yizewe, biotech (abakora ubwo bushakashatsi muri Labo) bateganyije kuzakora byibuze miliyoni 500 z’imiti ku mwaka.
Ibiro ntaramakuru by’Ubufaransa, Agence France-Presse (AFP), Ku wa kabiri tariki 14 Nyakanga 2020, byatangaje ko abantu barenga miliyoni 13 mu bihugu 196 bamaze kwandura coronavirus. Leta zunze Ubumwe za Amerika akaba ari cyo gihugu cyibasiwe cyane kuko imaze gupfisha abantu barenga 136432 mu bantu barenga miliyoni 3,42 banduye COVID-19, ikaba ikurikirwa na Brezil imaze gupfusha abantu barenga 74133 ku bantu barenga miliyoni 1,9 banduye COVID-19.
Iyi nkuru dukesha ikinyamakuru “Le Courrier” ivuga ko Ubwongereza bumaze gupfusha abantu barenga 44968 mu bantu 292931 banduye, hagakurikiraho Mexico imaze gupfisha abantu 35491 mu bantu 311486 banduye. Ku wa kabiri tariki 14 Nyakanga 2020, ikigo cy’ubushakashatsi cy’Abanyamerika cyatangaje ko tariki 27 Nyakanga 2020 kizinjira mu cyiciro cya nyuma cy’igerageza mu buvuzi, ku rukingo rwa COVID-19, nyuma yo gushyira ahagaragara ibisubizo by’ibanze.
Icyiciro cya 3 cy’igerageza ry’urukingo kizitabirwa n’abantu 30000 muri Amerika; kimwe cya kabiri cyabo bazahabwa doze ya microgram 100. Intego ya mbere y’iri gerageza ni ukumenya niba urwo rukingo rwakwizerwa kandi rukarinda kwandura SARS-CoV-2. Indi ntego y’igerageza y’uru rukingo ni ukumenya niba umuntu wanduye coronavirus, urwo rukingo rushobora gukumira kwiyongera kw’ibimenyetso bya COVID-19.
