Umuhanga mu bumenyi bwa Siyansi yaragize ati” rya ibiryo nk’imiti, kuko hari igihe uzarya imiti nk’ibiryo(Eat food as medicine while you will eat medecime as food), aha ntiyari ashatse kuvuga ko umuntu arya ibibonetse byose, cyanga ngo arye byinshi kuburyo no guhaguruka aho yicaye bimunanira. Icyo gihe uyu muhanga yari ashatse kuvuga ko nutarya ibiryo bikungahaye ku ntungamubiri, ugahitamo kurya ibikuryohera byica umubiri wawe, icyo gihe uzarya imiti myinshi uri kwivuza.
Ni kenshi umuntu ajya kwa muganga bakamubwira ko arwaye indwara yo kubura vitamin B, akibaza aho azayikura kandi buri munsi aba ari kumwe nayo. Hari abatekereza ko.indwara ya Beriberi iterwa no kurya umuceri mwinshi, abo baribeshya cyane kuko n’uwo muceri ukungahaye kuri vitamini irwanya iyi ndwara. Hakaba n’abatekereza ko indwara yo gufatwa n’imbwa cyangwa se kwikanga kw’imitsi yaba iterwa n’uko umuntu yatsikiye, abo nabo baba bibeshya kuko buri kintu kibaho kuko bitagenze neza mu mubiri. Akenshi iyo umuntu afashwe n’imbwa, usanga amaraso yipfundikiriye ahantu hamwe, aho byabereye rero hagafatwa n’iyo mbwa. Nyuma yo kubona no kumenya ibi byose, Isezerano.com ibikesheje urubuga rwa Umutihealth.com, igiye kubagezaho bimwe mu byagufasha kurwanya iyi ndwara.
Ubusanzwe habaho ubwoko bwa Vitamin B bwinshi, ariko kuri iyi nshuro tugiye kwibanda kuri bumwe muri ubwo bwoko, aribwo Vitamin B1. Benshi ntibakunze kuyimenya, ahubwo benshi usanga bakunze kumenya ubwoko bwa vitamini B12, nyamara kumenya n’ubundi bwoko nabwo ni ngenzi.
Iyi Vitamini B1 ni vitamini y’ingenzi mu buzima bwa muntu bwa buri munsi, kuko hari ibibazo byinshi ihangana nabyo, birimo indwara z’umutima ndetse n’imitsi itwara Amaraso mu mubiri.Ituma umubiri uhinduramo ibinyamasukari isukari nayo ikoreshwa mu gutanga ingufu, inakoreshwa kandi mu gushwanyaguza ibinure na vitamini bikabyazwa ingufu mu mubiri.
Iyi Vitamini ni nziza cyane, kuko irinda uruhu ndetse n’umubiri gusaza vuba. ifasha mu ikorwa ry’insoro zitukura, mu mikorere y’umutima, ubwonko no kwibuka(kwibuka icyo wari wibagiwe) kandi ituma umuntu wari warabuze appétit yongera kuyibona. Izwiho kandi kurinda amaso kurwara ishaza. Uretse ibyo kandi inafasha mu mikorere y’imikaya (muscles) yo mu rwungano ngogozi, kimwe n’imikorere myiza y’uruhu, imisatsi, amaso, umunwa n’umwijima. Inafasha umubiri guhangana na stress niyo mpamvu banayita vitamini irwanya stress.
Vitamini B1 iboneka he?
Iyi vitamini iboneka henshi hatandukanye, ariko muri ho reka tubabwire ah’ingenzi mushobora kuyisanga.Mu bimera iboneka cyane mu bishyimbo, ibinyampeke (ibigori, umuceri, ingano, amasaka), ibijumba, imineke, ibihumyo, epinari, urunyogwe, inyanya, ibihwagari, inaboneka kandi mu binyomoro, imineke, n’amashu ya chou-fleur.
Mu matungo iboneka mu nyama y’ingurube, ariko nanone birazwi ko ingurube ari yo soko ya mbere ya teniya iyo itateguwe neza ngo ishye bihagije. Iboneka no mu nyama y’umwijima n’umusemburo (yeast).
Iyi vitamini ntabwo ikunze kuba nyinshi mu mubiri, kuko iyo ibaye nyinshi, umubiri utangira gusohora ibidakenewe. Iyo ibaye nke kandi bikaba ngombwa ko uyiterwa mu rushinge, uba wumva umeze nk’uri gushya, ndetse ukumva umubiri wose ucitse intege. iteza mu mubiri ibibazo binyuranye. Birimo Kudashaka kurya, kubura ibitotsi, kunanuka, kutituma no kwituma impatwe, no kurwara imbwa (ibinya akenshi bifata mu mpfundiko ukananirwa kugenda kandi uribwa cyane).Iyo bidakosowe hakiri kare nibwo umuntu arwara indwara yitwa Beriberi, iterwa no kubura vitamini B1.
Iyi ndwara irangwa n’imikorere mibi y’imitsi, umutima n’ubwonko. Byiyongera cyane ku banywi b’inzoga nyinshi, aho ananirwa gutambuka, agahora ahumbaguza anasusumira. Niyo mpamvu ugirwa inama yo kurya bike birimo intungamubiri, aho kurya byinshi byangiza umubiri wawe, kandi burya ngo kugira amasaha meza yo kuriraho bifasha umubiri gukora igogora neza kandi ugasabwa kunywa amazi menshi k’umunsi, kuko nayo ayungurura imyanda mu mubiri, kandi akaba kimwe mu bigize igice kinini cy’umubiri w’umuntu ku kigero cyo hejuru.
