KATABARWA Gilbert

Bitewe n’icyorezo cya Coronavirus, cyahungabanyije gahunda nyinshi zibera ku Isi harimo n’ubucuruzi, abayisilamu bitegura umunsi wa Eid al-adha bari kugurira amatungo kuri interineti, bazifashishasha kuri uwo munsi.

Ihene zifite ikirango cya “007” ni zimwe mu bihumbi by’ihene zigurishirizwa ku rubuga rwa interineti, bitewe n’uburyo coronavirus yatumye ingendo n’ubuhahirana bikomwa mu nkokora. Amamiliyoni y’ihene, intama n’inka biricwa buri mwaka mu gihe cya Eid-al-Adha (umunsi mukuru w’ibitambo). Akaba ari umwe mu minsi mikuru ikomeye yizihizwa n’abayisilamu ku Isi yose, harimo na miliyoni 600 bo muri Aziya y’epfo bayizihiza.

Icyorezo cya coronavirus cyibasiye cyane Ubuhinde, Bangladesh na Pakistan, bikaba byaratumye amasoko yahoo akomeye afungwa, bityo kubera ubwoba bwo gufata virusi bituma abantu batarema amasoko. Uwitwa Saddid Hossain yabwiye ibiro ntaramakuru by’Ubufaransa AFP mu murwa mukuru wa Bangladesh, Dhaka ati: “Twababajwe no kubura ba data wacu babiri bishwe na COVID-19 kandi ntitwashakaga no gutamba itungo, ariko tugomba kuguma mu muco gakondo w’idini ryacu, bityo twahitamo nibura kugura inka binyuze ku rubuga rwa interineti.”

Mu rwego rwo guhangana n’ihagarara ry’amasoko, Aborozi n’Abacuruzi bahindukiriye ku mbuga za interineti, porogaramu n’imbuga nkoranyambaga kugira ngo berekane amatungo yabo. Fahad Zariwala yamamaza ihene ze ku rubuga rwe rwa YouTube, kuri ubu rukurikirwa n’abantu barenga 800.000. Ihene ze zororerwa mu biraro byo mu Buhinde, zikaba zifite ikirango cya 007.

Zariwala ufite icyicaro i Mumbai yagize ati: “Nkora amashusho agaragaza ihene zanjye, kandi ayo mashusho azerekana haba harimo n’injyana y’umuziki utuje, ugenda gahoro”. Zariwala yabonye ubwiyongere bukabije bw’abakurikira urubuga rwe baturutse muri Australia, Ubwongereza, Amerika ndetse n’Uburasirazuba bwo Hagati, kandi bose bafite diaspora nini yo muri Aziya y’Epfo. Bmawe mu bamurika amatungo yabo ku mbuga za interineti, bavuga ko babona ari byiza kandi bigenda neza.

Itsinda rigurisha amatungo kuri interineti ryitwa PashuBajaar, ryavuze ko kugurisha ku rubuga rwa interineti, byavuye ku icumi mu mwaka ushize bigera ku barenga 2500 mu mezi atatu ashize. Sanjeev Kumar, umuyobozi mukuru wa PashuBajaar yabwiye ibiro ntaramakuru by’Ubufaransa AFP ati: ” uyu mwaka utaha dufite ibihumbi by’abantu byamaze kuduha komande y’ibyo bashaka kuzagura.” Amatungo ashyikirizwa abaguzi, atwawe n’ibikamyo. Igikamyo kimwe kikaba gishobora gutwara amatungo ari hagati ya 10 na 15 icyarimwe.

Iyi nkuru dukesha “Aljazeera.com” ivuga ko, Pakistan yiganjemo Abayisilamu, ituwe n’abantu miliyoni 215, kubera ubwinshi bwabo havutse porogaramu nyinshi n’imbuga za interineti kugirango babashe gukora gahunda zabo za buri munsi biboroheye. Abaguzi bashobora guhitamo itungo banyuze ku rubuga rwa interineti, ubundi bakaribagereza ku muryango wabo, cyangwa ku ibagiro. Umuyobozi mukuru wa Qurbani App, Muhammad Ali Chaudhry nawe ucururiza ku rubuga rwa interineti yagize ati: “Abaduha komande z’ibyo bashaka baragenda biyongera umunsi ku munsi.”

Hagati aho, umworozi w’ihene wa Islamabad, Muhammad Naeem, yavuze ko ubucuruzi bwe bwo kuri interineti bwateye imbere cyane, ngo kuko bwavuye kuri 20% by’igurisha bugera hafi kuri 50%. Gusa izamuka ry’ubucuruzi bwo kuri interineti ryaherekejwe no kugabanuka kw’ibiciro. Umucuruzi wo muri Mumbai mu Buhinde, Walid Dawood Jat, wagurishije ihene esheshatu binyuze ku rubuga rwa interineti mu gihe cya lockdown, yavuze ko bazigurishije hafi kimwe cya kabiri cy’ibiciro byari bisanzwe.

Ati: “Twagurishaga ihene ku mafaranga y’amarupi akoreshwa mu Buhinde ari hagati ya 500 na 600, angana n’amadolari ari hagati ya 6.70 na 8.00 ku kilo, none ubu igiciro cyagabanutseho kimwe cya kabiri”. Abacuruzi bavuga ko abaguzi babatonganya, bababwira ko nta mafaranga bakibona kuko nabo aho bayavanaga hatari kwinjiza.

Mu isoko rinini ry’inka riherereye i Dhaka, kugurisha amatungo byaragabanutse cyane, ku buryo mu myaka yashize bagurishaga inka 400.000, ariko ubu bari kugurisha izigera ku 30.000 gusa. Umucuruzi Kalu Bepari wagenze ibirometero 245 agiye kugurisha ibimasa 13, ariko yagurishije bibiri gusa kandi nabwo ku giciro gito.

Perezida Trump avuga ko amashuri adahuza abarimu n’abanyeshuri imbona nkubone muri uyu mwaka w’amashuri, agomba kohereza amafaranga ateganijwe kuri buri munyeshuri agahabwa ababyeyi babo kugira ngo bayakoreshe mu mashuri yigenga cyangwa kuyifashisha bigira mu rugo.

Ku wa kane, Trump yagize icyo abivugaho mu kiganiro yagiranye n’abanyamakuru, avuga ko ababyeyi benshi bafite kuzaguma mu rugo, mu gihe amashuri atarasubira mu buryo byo kwiga busanzwe. Perezida Trump wari usanzwe ashyigikiye uguhitamo kw’amashuri, yavuze ko kudafungura amashuri bizagira ingaruka mbi ku banyeshuri.

Trump yagize ati: “Niba amashuri atongeye gufungura, inkunga igomba kujya ku babyeyi kugira ngo bohereze abana babo mu bigo bya Leta, ibyigenga, iby’amadini cyangwa amashuri yo mu rugo bitewe n’amahitamo yabo.”  Akomeza agira ati niba ishuri rifunze, amafaranga agomba gukurikira umunyeshuri kugirango ababyeyi n’imiryango y’umwana bayagenzure uko bashaka bitewe naho bifuza ko ajya kwiga. Akaba ariyo mpamvu dushaka ko amafaranga yahabwa umubyeyi w’umunyeshuri. Ubu buryo, bushobora kubaha icyemezo cyiza kibabereye.”

Ati: “Ntidushobora guhagarika burundu abana miliyoni 50 b’Abanyamerika kujya ku ishuri kuko byakwangiza imitekerereze yabo, umubiri wabo ndetse n’amarangamutima yabo.” Donald Trump yavuze ko gufungura amashuri, nabyo ari ngombwa kugira ngo ababyeyi bashobore kujya ku kazi no gushaka ibitunga imiryango yabo. Yavuze ko ababyeyi bagera kuri miliyoni 5.6 batazashobora gusubira ku kazi, mu gihe amashuri atarongera gufungura.

Trump yagarutse ku nyandiko yo muri Kamena 2020, y’ishuri ry’Abanyamerika ryita ku bana bato. Iyo nyandiko yavugaga ngo “kumara igihe kinini kure y’ishuri no guhagarika serivisi zifasha abanyeshuri akenshi bivamo kwigunga, bigatuma amashuri abigora kumenya no gukemura ibibazo by’imyigire ndetse n’umwana, ndetse binatuma habaho ihohoterwa rishingiye ku gitsina, gukoresha ibiyobyabwenge, kwiheba, ndetse n’ibitekerezo byo kwiyahura ku ngimbi.”

Iyi nkuru dukesha “Christian Headlines” ivuga ko ishuri ry’Abanyamerika ryita ku bana ryagize riti: “Ibi na byo bituma abana n’ingimbi bashobora guhura n’ikibazo cyo kwandura indwara, ndetse rimwe na rimwe bagapfa.” Ati: “Usibye ingaruka z’uburezi n’ingaruka z’imibereho yo gufunga amashuri, habayeho ingaruka zikomeye zo kutihaza mu biribwa no mu mikorere y’abana n’imiryango yabo.” Trump yagize ati: “Amashuri agomba gufungura mu buryo bwiza buboneye, ariko agomba gufungura.”

Hagati aho, Trump yavuze ko yasabye inama y’ubuyobozi bafatanyije kuyobora gutanga miliyari 105 z’amadolari mu mashuri, kugira ngo bashyigikire amashuri afite ingano ntoya, abarimu benshi ndetse n’ibikoresho bifasha abarimu, kwambara udupfukamunwa, ndetse no kubafasha kongera ubunini bw’ahantu ho kwigira, mu rwego rwo kubafasha kubahiriza gusiga intera hagati y’umuntu n’undi.

Trump yagize ati: “Ibihugu birenga icumi by’i Burayi, kimwe na Koreya y’Epfo, Tayiwani n’ibindi byinshi, bimaze gufungura amashuri, kandi nta barwayi bashya ba COVID-19, bagikunze kuboneka muri ibyo bihugu.” Ati: “dushobora kugera ku ntego imwe nitwishyira hamwe, tugakurikiza uburyo bwiza bwo kwivuza, kandi tugashyira mu bikorwa ibyo twiyemeje.”

Abagabo batanu bo muri Nigeria, barimo abakristo batatu, bishwe n’intagondwa z’abayisilamu.

Izi mpfu z’aba bagabo zafashwe amashusho (video) y’amasegonda 35 yashyizwe kuri YouTube na Eons Intelligence mbere yuko ikurwaho. Yerekanye abo bagabo babapfutse mu maso n’ibitambaro by’umutuku, kandi bapfukamye imbere y’intagondwa eshanu z’abayisilamu zibafatiyeho imbunda zo mu bwoko bwa AK-47.

Umwe muri abo bicanyi, imbere ya Camera yahise avuga, mbere yuko batangira igikorwa cy’ubwicanyi, aburira abandi bakristo ko aribo bazakurikiraho nibaramuka badahagaritse kuvuga Ubutumwa bwiza bwa kristo cyangwa nibadahinduka ngo bajye mu idini ya Islam.

Nk’uko ikinyamakuru “Morning Star News” kibitangaza, umwe muri abo bicanyi yagize ati: “Ubu ni ubutumwa ku bantu bose bakoreshwa n’Abakafiri kugira ngo bahindure Abayisilamu babe abakristo.” Kuko ababakoresha babahindura abakristo, ntibabakunda, bo bikunda ku giti cyabo, Kandi iyo ni yo mpamvu igihe cyose tuzagufata, batazaza kugutabara cyangwa ngo bagire icyo bakora kugira ngo tukurekure”. Aba bicanyi bakomeje batanga ubutumwa ku bakristo bavuga bati: “ibi byose bikwereka ko batagukeneye kandi badaha agaciro ubuzima bwawe, rero turaguhamagarira kugaruka kuri Allah ukaba umusilamu. Kandi tuzakomeza guhagarika inzira zose munyuramo. “Niba utumviye umuburo wacu, iherezo ry’aba bantu batanu niryo rizakubaho.” Arangije ubutumwa bwe, abo bagabo batanu bararashwe.

Umuturage utuye Borno yatangarije ikinyamakuru “Morning Star News” ko abakristo batatu bari: Ishaku Yakubu, wo mu Itorero rya Brethren (EYN); Luka Filibus nawe akaba ari uwo mu Itorero rya EYN; na Joseph Prince wasengeraga muri Redeemed Christian Church muri Maiduguri. Aba bagizi ba nabi, babarizwa mu mutwe wa Boko Haram (ISWAP), ukunze guteza umutekano mucye mu burengerazuba bw’Afurika.

Iyi nkuru dukesha “Christian today” ivuga ko abandi bantu babiri mu bishwe byemezwa ko bari Abayisilamu. Bivugwa ko ISWAP (Islamic State in West Africa Province) yari yasabye amadolari 500.000 $, kugirango barekurwe. Scot Bower umuyobozi mukuru ushinzwe ibikorwa bya Christian Solidarity ku Isi, yavuze ko ingabo z’igihugu cya Nigeria zigomba kongererwa imbaraga mu rwego rwo kurinda abakristo n’abandi mu majyaruguru ya Nigeria.

Scot Bower yagize ati: “Christian Solidarity Worldwide yihanganishije cyane imiryango ya Abdulrahman Babagana, Darman Dungus, Joseph Prince, Ishaku Yakubu, na Luka Filibus kandi yamaganye cyane mu buryo bukomeye, abicanyi barenze ku mategeko mpuzamahanga”.

Scot Bower asoza agira ati: “Turasaba guverinoma ya Nigeria guha ibikoresho bihagije imitwe ya gisirikare ikorera mu majyaruguru y’uburasirazuba bw’igihugu, kugira ngo ibashe gukemura burundu iterabwoba, kandi itange umutekano uhagije ku baturage.”

Abakristo basabwe kureka kwizera Yesu cyangwa bakamburwa inkunga bahabwaga, muri iki gihe cya coronavirus mu bihugu bimwe na bimwe bya Aziya no muri Sudani.

Raporo zitandukanye zavuze ku itotezwa ry’abakristu, bo mu bihugu byo mu majyepfo y’uburasirazuba bwa Aziya na Sudani. Vermeer ukorera umuryango mpuzamahanga wa Open Doors, yatangaje ko abaturage baho bababwiye ko, bazahabwa ibibatunga ari uko baretse imyemerere ya gikristo, bakagaruka ku myerere yabo ya gakondo.

Ibyo byatumye imiryango imwe n’imwe, ihitamo gusubira mu idini ryiganje mu gihugu cyabo, gusa Vermeer yavuze ko abandi batekereje kwiyahura bitewe n’itotezwa bari bari guhura naryo. Raporo zatanzwe na Vermeer zigarukwaho na Pastor Sam nawe ukorera Open Doors mu majyepfo y’iburasirazuba bwa Aziya, wavuze ko mu cyaro cya Bangladesh, guverinoma zitanga ubufasha ku bantu benshi, ariko abakirisitu benshi, cyane cyane abavuye mu idini ya Islam, cyangwa mu idini ya Buda, bakaba abakristo ntibahabwa inkunga mu midugudu batuyemo.

Pastor Sam yongeyeho ko ubusanzwe abayobozi b’imidugudu baho bavangura abakirisitu mu bandi bantu, ngo kuko bababwira ko, ubwo babaye abakristo iyo nkunga itabareba. Pastor Sam yabisobanuye agira ati: “Abantu bashobora gupfa cyangwa gusubira mu idini ya Islamu niba badafite uburyo bwo kubaho.”

Yavuze ko iyo hatabaho inkunga Open Doors, yateganyije mu turere tumwe na tumwe, abakristo benshi bari gupfa bazize imirire mibi n’inzara, cyangwa bagahitamo kureka gukurikira Yesu, kuko bitari biboroheye. Yakomeje agira ati: “Benshi muri abo bizera bashya, bafite kwizera gucye kandi bakeneye gukomera muri Nyagasani”.

Hagati aho, Open Doors muri raporo yayo ivuga ko, muri Sudani abantu bahinduye idini bava muri Islam bakaba abakristo, bafite ibibazo byo kutagira aho baba ndetse n’inzara, muri ibi bihe bya Covid-19, ngo keretse babanje bakareka kwemera Yesu, bakagaruka muri Islam.

Iyi nkuru dukesha “Christian today” ivuga ko Umupasitori umwe wo muri ako gace, yabwiye Open Doors ati:”Abizera bakomoka mu Bayisilamu bagomba kwigirira icyizere rwose, kuko nta nkunga bahabwa n’imiryango yabo, cyangwa se na Communaute baturukamo, kubera kwizera kwabo. Ariko kubera ko abantu batari gukora bitewe na gahunda ya “Guma mu rugo”, ntibafite amafaranga yo guhaha, ndetse abandi bari kwirukanwa mu mazu kubera bananiwe kwishyura ubukode.

Yongeyeho ati: “Iyo umukristo asabye ubufasha umuryango yahozemo wabo w’abayisilamu, bamubwira ko agomba kureka ubukristo niba ashaka gufashwa. Ikindi gikomeye ni uko, mu cyaro cyo mu burasirazuba bwa Malaysia, Open Doors ivuga ko itsinda ry’abanyeshuri b’abakristu babwiwe n’umusigiti waho, mu gihe cya lockdown, ko batazabona imfashanyo y’ibiribwa batarasubira mu idini ya Islam.

Nk’uko Open Doors ibitangaza muri raporo yayo, mu majyaruguru ya Vietnam, abakristu barenga 100, abenshi muri bo, bari abasaza n’abana, ariko leta yabimye inkunga y’ibiribwa kubera kwizera kwabo. Abayobozi babwiye itsinda ry’abantu 107 bati: “Muri abakristo kandi Imana yanyu izita ku miryango yanyu! Guverinoma ntabwo ishinzwe imiryango yanyu!”

Umugabo n’umugore bo muri Yorodani ibyishimo byabarenze bumvise ko, urugendo rukomeye rw’Abayisilamu I Maka rwahagaritswe mu rwego rwo gukumira no kurwanya ikwirakwira ry’icyorezo cya COVID-19.

Ariko ku bandi benshi, byababaje cyane, kuba uru rugendo rwahagaritswe, kuko ari umwe mu mihango ikomeye mu idini ya Islam kandi ihuza abantu benshi ku Isi. Uru rugendo rugomba gutangira ku ya 29 Nyakanga 2020. I Maka hagomba kubera urugendo rutagatifu, ni muri Arabiya Sawudite akaba ari igihugu cy’Abarabu, kuri ubu kikaba cyibasiwe cyane na coronavirus, abagera kuri 256000 bamaze kwandura coronavirus, mu gihe abarenga 2557 bamaze guhitanwa nayo.

Mu mwaka wa 2019, uru rugendo rwari rwitabiriwe n’abantu miliyoni 2,5 baturutse impande zose z’Isi, ariko kubera gutinya ko rwazaba intandaro yo gukwirakwiza icyorezo, ubuyobozi bwaho bwavuze ko abantu bagera ku 1000, aribo bonyine bazarwitabira. Ariko ibitangazamakuru byaho bivuga ko imibare y’abazitabira ari 10000. Gusa ngo muri uyu mwaka, “Abizerwa” baba muri Arabiya Sawudite ni bo bazemererwa kubirangiza, muri bo 70% azaba ari abanyamahanga ariko batuye muri Arabiya Sawudite naho 30% azaba ari Abanyarabiya Sawudite.

Itangazwa ry’igabanuka rikabije ry’abazitabira uru rugendo, ntiryabujije ubwinshi bw’abantu bakomeza kubisaba, baturutse mu bihugu 160 byagombaga kuzitabira, nubwo abayobozi batatanze imibare y’ababisabye uko ingana. Ibiro ntaramakuru by’Abafaransa “AFP” byabajije Umunyanijeriya utuye muri Arabiya Sawudite, nawe uri mubagize amahirwe yo gutoranywa kuzitabira urugendo rutagatifu uko yabyakiriye, asubiza ko byamuteye ibyishimo bitagereranywa, mu gihe AFP hari abandi bantu benshi yabajije uko babyakiriye, bakavuga ko batabyishimiye kubera ko batazi icyo ubuyobozi bwashyingiyeho butoranya.

AFP ibaza Minisiteri ya Hajj, icyo yagendeyeho itoranya abazitabira urugendo, ntiyigeze isubiza icyo kibazo. Gusa Minisiteri ya Hajj nanone yari yaratangaje ko abazitabira urugendo, basanzwe bari muri Arabiya Sawudite batoranyijwe mu bakora umwuga w’ubuvuzi, n’abasirikare bakize virusi. Umushakashatsi Umar Karim wari watumiwe mu kigo cyitwa Royal United Services Institute i Londres, yatangarije AFP ko: Abayobozi bakomeje inzira yo gutoranya mu buryo budasobanutse kandi ari ikibazo gikomeye.

Ubundi imwe mu nkingi eshanu za Islam, harimo ivuga ko buri musilamu asabwe gukora urugendo rutagatifu rujya I Maka, nibura rimwe mu buzima bwe mu gihe abishoboye.

Iyi nkuru dukesha “JDM: Journal de Montréal” ivuga ko kuba Arabiya Sawudite, igabanyije umubare w’abakora urugendo rutagatifu, ari icyemezo gifite ingaruka zikomeye ku bukungu bwayo, kuko ubwami bwa Arabiya Sawudite bwinjizaga amamiliyaridi y’amadolari buri mwaka mu bukerarugendo bw’amadini. Ibi kandi bibaye mu gihe iki gihugu gisanzwe kiza ku isonga, mu bihugu byohereza ibicuruzwa byinshi mu mahanga, kimaze kwibasirwa cyane n’igabanuka ry’ibiciro bya peteroli.

Karim avuga ko abantu benshi bifuza gukora Hija, muri uyu mwaka kuko bakeka ko bitazaba biremereye kandi bitunganijwe neza kubera imbaga nto y’abantu. Nubwo umubare w’abasura Maka wagabanutse ku buryo bukabije, ariko ingamba zirakomeje zo kwirinda kugirango hagabanywe ikwirakwira rya coronavirus. Abayobozi bavuze ko abazajya mu rugendo rutagatifu I Maka, bazabanza bagapimwa coronavirus mbere yo kugera mu mujyi mutagatifu wa Maka, kandi bazabanza bashyirwe mu kato mbere na nyuma y’imihango izaba iteganyijwe.

Ubushinwa bwategetse abaturage b’Abakristo kureka ukwemera kwabo, ahubwo bakaramya abayobozi b’Ishyaka rya gikomunisiti.

Muri Mata 2020, abategetsi b’Abashinwa basuye amazu ya gikirisito i Linfen mu majyaruguru y’intara ya Shanxi, maze babwira abaturage baho ko, bagomba kumanura imisaraba yose, n’ibindi byose byerekeranye na Yesu, bakabisimbuza amashusho ya Chairman Mao Zedong na Perezida Xi Jinping.

Abakirisitu bose banze kubahiriza icyo cyifuzo, bahagarikiwe inkunga bahabwaga na Leta. Umupasitori umwe wo muri ako gace yabwiye igitangazamakuru “Bitter Winter” ati: “Imiryango yose ikennye yo muri uwo mujyi yasabwe kwerekana amashusho ya Mao Zedong. Guverinoma yagerageje gukuraho imyizerere yacu kandi ishaka kuba Imana aho kureka ngo dukomeze turamye Yesu kristo.”

Mu mudugudu umwe, umukirisitu yavuze uburyo abayobozi bakuyeho ku gahato amashusho yose ya gikristo, harimo n’amashusho yose ya Yesu mu rugo rwe. Abayobozi bamanuye ayo mashusho bayasimbuza ishusho ya Mao Zedong. Abayobozi babwiye Umukristo bati: “Imiryango ikennye ntishobora kubona amafaranga ava muri leta ku busa, bagomba kumvira Ishyaka rya gikomunisiti kubera amafaranga bahabwa.”

Iyi nkuru dukesha “Christian today” ivuga ko, ikindi gihe muri Gicurasi, abayobozi binjiye mu rugo rw’umukirisitu mu ntara y’iburasirazuba bwa Shandong. Bageze muri urwo rugo, bashyizeho amashusho ya Mao Zedong na Xi Jinping baravuga bati: “Izi ni Imana zikomeye, niba ushaka gusenga umuntu, ni bo ugomba gusenga.”

Nanone mu gace ka Henan mu mujyi wa Shangqiu, abayobozi basuye urugo rw’umukristu ukuze bahagarika amafaranga make yo kubaho yari asanzwe ahabwa na Leta kuko bari bavumbuye ishusho y’umusaraba yashyizwe ku muryango w’inzu ye. Uyu mukecuru akomeza atabaza agira ati: “ndi kugenda nsatira urupfu, kuko inkunga Leta yampaga yarayihagaritse kandi ndwaye na diyabete ku buryo nkenera guterwa inshinge buri gihe.”

Muri Kamena, abategetsi bo mu ntara ya Henan nabwo bataye muri yombi umugabo umwe w’umukristu, n’abandi bagore babiri b’abakristu barakomereka, ubwo abayobozi bagabaga igitero ku rusengero rwa Sunzhuang, basenya itorero bakoresheje imashini ziremereye cyane.