Home Amakuru y'ibanze Nigeria: Nyuma yo kwandika asebya Intumwa y’Imana Mohammed, UN yategetse ko afungurwa

Nigeria: Nyuma yo kwandika asebya Intumwa y’Imana Mohammed, UN yategetse ko afungurwa

by Marie Joseline Nyituriki

Umusore wo mu gihugu cya Nigeria wari umaze umwaka urenga afunzwe, akurikiranweho gutuka no gusebya Intumwa y’Imana Mohammed abinyujije kuri Facebook ye, Akanama k’impuguke k’umuryango w’Abibumbye kategetse ko afungurwa.

Akanama k’impuguke z’umuryango w’abibumbye (ONU/UN) kasabye Abayobozi ba Nigeria gufungura umugabo ukomeye uzwiho guharanira ubumuntu no kutemera Imana umaze umwaka umwe afunzwe.

Mubarak Bala w’imyaka 36, yafunzwe nyuma y’ikirego cyatanzwe kuri polisi muri leta ya Kano mu majyaruguru y’igihugu, kivuga ko yatutse Intumwa y’Imana Mohammed mu butumwa yashyize kuri Facebook.

Mu itangazo impuguke za ONU zasohoye, zagize ziti:

“Guta muri yombi no gukomeza gufunga Bwana Bala ntabwo ari uguhonyora bikomeye uburenganzira bw’ibanze gusa, ahubwo byanagize ingaruka zikomeye ku ikoreshwa ry’ubwisanzure bw’ibanze muri Nigeria”.

BBC dukesha iyi nkuru ivuga ko izo mpuguke zavuze ko zababajwe no kubona abategetsi ba Nigeria batarubahirije itegeko ryo ku itariki ya 21 y’ukwezi kwa cumi na kabiri mu 2020 ryatanzwe n’urukiko rukuru rwa Nigeria ryo gufungura Bwana Bala.

Urwo rukiko rwanategetse ko afungurwa by’agateganyo ndetse agahabwa n’impozamarira ingana n’ama-naira 250,000 (ni arenga gato 612,000 y’u Rwanda) kubera ko uburenganzira bwe bwahonyowe.

Iburanisha ryari riteganyijwe ku itariki ya 20 Mata 2021, ntabwo ryabaye kuko abakozi bo mu rwego rw’ubucamanza bari bari mu myigaragambyo.

Akanama k’impuguke za ONU kasabye leta ya Nigeria gutuma ibyemezo by’inkiko byubahirizwa.

You may also like

Leave a Comment