Home Amakuru y'ibanze Paruwasi Gatorika ebyiri, zafunzwe mu gihe kingana n’ukwezi

Paruwasi Gatorika ebyiri, zafunzwe mu gihe kingana n’ukwezi

by Marie Joseline Nyituriki
0 comment

Mu gihe imibare y’abantu bandura icyorezo cya Corona virus buri munsi yiyongera, hari abakomeje kurenga ku mabwiriza yo kukirinda. Muri abo, harimo Abakirisitu bo muri za Paruwasi Gatorika 2 zitandukanye, zo mu burasirazuba bw’u Rwanda.

Musha na Rukara nizo Paruwasi Gatorika 2 zo mu Ntara y’Iburasirazuba, zafunzwe mu gihe cy’ukwezi kose zinacibwa amande angana n’ibihumbi 50 Frw nyuma yo gusangwa zarenze ku mabwiriza yo kwirinda COVID-19.

Ibi byabaye ku wa Gatandatu tariki 12 Kamena 2021, aho Paruwasi ya Musha iherereye mu Karere ka Rwamagana, yarasanzwemo abantu 97 bitabiriye umuhango w’ubukwe bwari bwashyingiwemo abageni 2, ndetse na Paruwasi ya Rukara iherereye mu Karere ka Kayonza aho hari harimo abarenga 200 bitabiriye misa yo gusabira uwari ugiye gushyingurwa.

Umunyamabanga Nshingwabikorwa w’Umurenge wa Musha, Muhoza Théogène yabwiye Igihe.com ko bahamagawe n’umuturage ababwira ko ku kiliziya hari gusezeranira abantu batubahirije amabwiriza yo kwirinda COVID-19. Mu kugerayo ngo basanze abantu bitabiriye uyu muhango begeranye cyane.

Ati “ Twarabafashe kuwa Gatandatu turi kugenzura uko amabwiriza yo kwirinda COVID-19 ashyirwa mu bikorwa, twahamagawe n’abaturage batubwira ko abantu bari gusezeranywa barenze ku mabwiriza, tujyayo dusanga abari gusezeranywa baturutse mu Murenge wa Gahengeri bari 97.”

Yakomeje avuga ko bahise babafata babashyira mu kibuga barabigisha ubundi babasobanurira ko ibyemezo by’Inama y’Abaminisitiri bivuga ko umuhango w’ishyingirwa utagomba kurenza abantu 30.

Avuga ko hashingiwe ku mabwiriza yashyizweho iyi paruwasi yahanishijwe gucibwa amande y’ibihumbi 50Frw no guhagarikwa ukwezi.

Ku ruhande rwa Paruwasi ya Rukara yo yafatiwemo abarenga 200 no hanze ngo hari abantu benshi bitabiriye misa yo gusabira uwitabye Imana.

Umunyamabanga Nshingwabikorwa w’Umurenge wa Rukara, Kanyarwanda John, yavuze ko ubuyobozi bwa Paruwasi ya Rukara butigeze bumenyesha ubuyobozi bw’Umurenge wa Rukara niba bari busengere uwitabye Imana kugira ngo babafashe kubahiriza amabwiriza, yavuze ko babikoze bitazwi bituma abantu bitabira ari benshi cyane.

Ati “ Amabwiriza ya mbere yateganyaga 50 % by’urusengero kandi kiliziya bari barimo ni nto cyane ku buryo na 50% hajyamo abantu batarenze 50 ariko hinjiyemo abantu benshi cyane ku buryo no hanze abari bahagaze bari benshi nta bwirinzi bafite.”

Kanyarwanda yasabye abaturage kumva ko icyorezo kigihari kandi gifite ubukana, avuga ko uburyo bwiza bwo kukirinda ni ukubahiriza amabwiriza atangwa na Minisiteri y’Ubuzima.Ati “Twirinde kwegerana n’ibindi bintu bihuza abantu benshi, twambare neza agapfukamunwa kandi turangwe n’isuku, insengero na kiliziya n’imisigiti bubahirize amabwiriza, ntibarenze umubare ujyenwa kuko bishobora gutuma babihanirwa.”

Izi kiliziya zose uko ari ebyiri, Zigiye kumara ukwezi kose zidasengerwamo ndetse zinatange amande zaciwe.

Mu bafashwe bakanaganirizwa, harimo abageni bari bashyingiwe.

You may also like

Leave a Comment