Home Amakuru y'ibanze Rusizi: Mu muhango wo gushyingura Padiri Ubald Rugirangoga, Ubuhamya n’amateka byamuranze byarijije benshi. Mu mafoto reba uko umuhango wagenze

Rusizi: Mu muhango wo gushyingura Padiri Ubald Rugirangoga, Ubuhamya n’amateka byamuranze byarijije benshi. Mu mafoto reba uko umuhango wagenze

by Marie Joseline Nyituriki
0 comment

Kuri uyu wa Kabiri tariki ya 02 Werurwe 2021, mu rugo rw’ibanga ry’Amahoro muri Diyosezi ya Cyangugu mu karere ka Rusizi, mu muhango wo gushyingura Padiri Ubald Rugirangoga, ubuhamya n’amateka byaranze ubuzima bwe byarijije benshi mubari bawitabiriye, ndetse n’abawukurikiranye hifashishijwe ikoranabuhanga.

Ni umuhango wabanjirijwe n’igitambo cya misa cyatuwe na Nyiricyubahiro Musenyeri Celestin Hakizimana, umushumba wa Diyosezi ya Gikongoro n’umuyobozi wa Cyangugu, giturirwa muri Kiliziya yubatswe na Padiri Ubald mu rugo yise Ibanga ry’amahoro. Ni mumuhango wari witabiriwe n’abo mu nzengo zitandukanye harimo iza Kiliziya ndetse n’iza Leta zari zihagarariwe n’umuyobozi w’Akarere ka Rusizi.

Musenyeri Celestin Hakizimana yayoboye igitambo cya misa.

Mu buhamya bwatanzwe n’umuvandimwe we Rugwizangoga Revelien, yavuze ko usibye kuba yari umuvandimwe we yari n’umubyeyi we ndetse akaba n’inshuti magara, by’umwihariko akamubera umujyanama wihariye kubera ubunararibonye yari afite mu buzima.

Yagize ati” kubona imbaraga zo kugira icyo mvuga biragoye, ariko Padiri Ubald Rugirangoga umuvandimwe wanjye, mukuru wanjye, sinamufataga nk’umuvandimwe gusa, kuko yari Data akaba na Mama, akaba inshuti yanjye ariko by’umwihariko akambera umujyanama kuko afite byinshi azi k’ubuzima. Akenshi twaraganiraga akanyigisha byinshi kandi byangiriye umumaro.”

Rugwizangoga wavuze nk’uhagarariye umuryango wa Padiri Ubald Rugirangoga yavuze bimwe mu byaranze ubuzima bwe harimo guca bugufi no gutanga imbabazi.

Yagize ati” Padiri Ubald Rugirangoga ni mwene Kabera Jack na Mukarihamya Anisie, avukana n’abana batatu nawe wa kane, muri abo bane ubu abasigaye turi babiri gusa, njyewe Rugwizangoga Revelien ndetse na mushiki wanjye Pascasie Nyampundu, kuko undi umwe yishwe muri Jenoside yakorewe Abatutsi mu 1994, na Ubald utabarutse muri uyu mwaka wa 2021. Data yari umwalimu mu mashuri abanza, aza kwicwa mu 1963 azize amacakubiri yari ariho icyo gihe Ubald yari afite imyaka 7 y’amavuko.”

Rugwizangoga Revelien murumuna wa Padiri Ubald.

Akomeza ati” Ubald mu buzima bwe yaranzwe no gutanga imbabzi, ndetse kwigisha ubumwe n’ubwiyunge. Benshi bamuzi nk’umunyampuhwe, ariko bajye bongeraho ko yari umuntu ukunda kubaka insengero, kuko naha yasomewe misa ari Kiliziya yubatse, ndetse no muri Paruwasi gatorika ya Mushaka yahubatse iyindi. Nyuma ya Jenoside yakorewe Abatutsi mu 1994, Ubald yareze abana benshi, ababera umubyeyi ndetse abisbyurira ishuri kuburyo ubu bamwe bavuyemo abagabo n’abagore beza.”

Nkuko kandi byatangajwe n’umuyobozi w’Akarere ka Rusizi bwana Kayumba Ephrem, yavuze ko Padiri Ubald yari umuntu ukunda gukora ibintu byose mu mucyo kandi agakunda gufatanya n’inzego za leta, bityo ko igihugu n’abakirisitu muri rusange bahombye umuntu w’intwari.

Yagize ati” mbere yuko ajya muri Amerika yarampamagaye ambwira ko ashaka ko nzamusura mu rugo rw’ibanga ry’Amahoro, akanyereka umushinga ari gutegura, kandi ko yatangiye kuwutegura ntaraba umuyobozi w’akarere. Muri rusange yari umuntu ukunda gukorera mu mucyo kandi agakunda gufatanya n’inzego zitandukanye harimo n’inzego bwite za leta. Buri muntu yakwibaza ati ese nubwo ntari padiri cyangwa se ndi we, ni iki nakora kugira ngo Padiri Ubald azahore yibukwa? Icyo nababwira ni uko twese nk’abakirisitu ndetse n’inzego bwite za leta tubuze umuntu w’intwari.”

Uyu muhango wari witabiriwe n’abantu bake barimo inshuti n’abavandimwe ndetse n’abayobozi mu nzego zitandukanye, wasojwe no gushyingura mu cyubahiro Padiri Ubald Rugirangoga, aho yashyinguwe ku gasozi k’ibanga ry’amahoro mu karere ka Rusizi muri Diyosezi Gatorika ya Cyangugu. Yatabarukiye muri leta zunze ubumwe za Amerika azize ingaruka za corona virus, atabaruka afite imyaka 66 y’amavuko, akaba yaritabye Imana tariki ya 08 Mutarama 2021.

Igitambo cya misa cyayobowe na Nyiricyubahiro musenyeri Celestin Hakizimana.

Yashyinguwe ku gasozi k’ibanga ry’Amahoro.

 

Padiri Ubald yashyinguwe mu cyubahiro.

You may also like

Leave a Comment