Inzoka yakoreshejwe igihe kirekire nk’ikimenyetso cy’ubuvuzi cyangwa muri Pharmacies kugeza nanubu kandi niko bimeze.
Ellen Lloyd ukorera ikinyamakuru Ancient Pages.com, avuga ko inzoka ari ikimenyetso kiranga ubuvuzi, kandi kuva mu mateka ya kera inzoka yagaragaraga izengurutse cyangwa yizingiye ku gisahani kimeze nk’inkongoro bashiramo divayi y’abapadiri muri kiliziya.
Ariko nanone hakaba aho igaragara izengurutse ku giti gihagaze.Hari amoko atandukanye y’inzoka akoreshwa nk’ikimenyetso cy’ubuvuzi. Kuri ubu nabwo ikimenyetso kiranga ahari Pharmacy ni inzoka, kikaba gituruka ku bagereki ba kera.
Iki kimenyetso kikaba cyarazanywe kandi kikamamazwa n’Umugereki witwa Asclepius, aho yatangiye akoresha icyitwa “Rod of Asclepius” iyi ikaba yari inkoni izengurutswe n’inzoka.
Tugendeye ku bimenyetso by’Abagereki mu buvuzi, uyu mugabo Asclepius mu gihugu cye cy’ubugereki bamwita Imana y’Abagereki mu buvuzi.
Asclepius yize ubugeni bwo kuvura agakiza abantu abikomoye kuri Se witwaga Apollo n’uwitwa Centaur Cheiron.
Asclepius amaze kuba inzobere mu kubaga abantu, no gukoresha imiti yatangiye gufatwa nk’uwavumbuye cyangwa uwatangije ubuvuzi mu bugereki ku buryo haje no kubakwa igishushanyo cy’ifoto ye iriho icyo kirango cy’ubuvuzi mu gace yavukiyemo kitwa Epidaurus.
Abagereki bizeragako Asclepius yarafite ubushobozi bwo kuzanzamura umuntu usa nk’uwamaze gupfa bitewe n’ubushobozi budasanzwe yarafite bwo gikiza.
Asclepius yaje gupfa gusa hubatswe ingoro ahantu hatandukanye ariko imbere mu nyubako bashyiramo inzoka zapfuye zibibutsa ibyakozwe nawe mu buvuzi.
Gusa igitangaje nuko izo nzoka bazishyiramo, zaje gutangira kugenda kandi zari zarapfuye, ibi Abagereki bakaba babifata nk’ubushobozi budasanzwe bwo gukiza bwasize bukozwe na Asclepius, akaba aribwo bakeka ko bwasigaye muri izo nzoka.
Inzoka zororwa (zo mu rugo), zashizwe mu Ngoro, nkuko izi nyamaswa zifatwa nk’ikimenyetso cyo kwiyuburura.
Guhera mbere y’imyaka 300 mbere y’ivuka rya Yesu, ubugeni bwa Asclepius mu buvuzi bwakomeje kwaguka cyane, ndetse buranasurwa cyane n’abantu bo mu bihugu bitandukanye kubera uburyo yavuragamo indwara.
Amakuru dukesha Ikinyamakuru Ancient Pages.com akomeza atubwira ko “Sacred Asclepion of Pergamum” aricyo kigo cy’ubuvuzi cyabaye icyambere ku Isi yose mu buvuzi muri icyo gihe.
Rod of Asclepius nanone izwi ku izina rya Staff of Asclepius, ikaba izwi nk’ikimenyetso kiranga ahakorerwa ubuvuzi cyangwa na za Pharmacies.
Hygieia we yari ikigirwamana cy’umukobwa wa Asclepius witwaga Hygieia, kibaka cyarashushanyaga Imana y’ubuzima mu bijyanye n’isuku. Iki kimenyetso nicyo cyitwa “Bowl of Hygieia”.
Inzoka mu Bagereki bo mu gihe cya kera yasobanuraga ibintu byinshi ariko byose bifite aho bihurira n’ubuzima. Muri byo harimo izuka, kuramya, ubufindo, ubuvuzi, urukundo, urupfu, umuti.
Hygieia akaba yarageze ikirenge mu cya Se, agasiga atanze umusanzu mu buvuzi ariko ashingiye kubyo Se Asclepius yasize akoze. Ancient Pages.com itubwira ko iyi arinayo mpamvu hari ibihugu byinshi bisenga bikanaramya inzoka nk’Imana yabo.
