Home Ubuhamya Nagiye muri Kaminuza ndi umusinzi wujuje ibyangombwa-Dr Bishop Fidele Masengo (Soma birambuye)

Nagiye muri Kaminuza ndi umusinzi wujuje ibyangombwa-Dr Bishop Fidele Masengo (Soma birambuye)

by Jean Claude Habinshuti
0 comment

Mu gihe yaganizaga abanyeshuri biga muri Kaminuza y’u Rwanda ishami rya Gikondo  baba mu muryango wa GBU  Bishop Fidele Masengo yatanze ubuhamya bujyanye n’uburyo Imana yamukijije ubusinzi bukomeye maze akakira Kristo.

Muri ubu buhamya yatanze Bishop Fidele Masengo yibanze cyane kubyo yakoraga akiri umupagani n’uburyo Imana yaje kumurokora ikoresheje inzira zayo z’ubuhanga zirimo n’uburwayi bwatumye ajya kwa muganga akahakirira ubutumwa bwiza.

Yagize ati :”Njyewe nagiye muri kaminuza mu mwaka wa 1995 mu kwezi kwa kane,njyamo mfite n’akazi ndi umusinzi wujuje ibyangombwa .Nari mfite imyaka 20,mfite moto,mpembwa amafaranga ,mfite na bourse ya Leta.Mu mwaka wa mbere n’uwa kabiri sinzi ubuzima bwanjye uko bwari bumeze,icyo nzi ni uko inshuro nyinshi naryamaga abantu bakambyutsa abandi bageze mu ishuri.Nari nzi ngo ndi umunyabwenge kubera ko natsindaga mu ishuri ariko Bibiliya iravuga ngo kubaha Imana nibwo bwenge”.

“Ngeze mu mwaka wa gatatu navuye i Butare njya i Bukavu nyuma y’intambara ya mbere ya Kabila, hari abantu benshi twabanaga bari bari mu gisirikare i Bukavu umwe arampamagaza aravuga ngo Masengo yaransengereraga aze nanjye musengerere,gusa ababyeyi banjye nabo bari batuye i Bukavu,ngezeyo nagombaga kuhamara icyumweru ariko icyo cyumweru cyashize ngeze iwacu rimwe ,indi minsi nararaga mu kigo cya gisirikare tukavamo tukarara mu mahoteri bafashe”.

“Icyumweru kirashira mfata agakapu nza mu rugo kandi ari nabwo ngomba kugaruka i Kigali,ababyeyi babona ninjiye mbabwira ngo ndagiye,ubwo kandi nari umuntu waje ngo nje kubasura.Icyo gihe Data yanywaga inzoga ariko amenye ko maze icyumweru cyose nibera mu nzoga azivaho ntiyongera kuzinywa.Mvayo ndaza ndara i Butare ,bukeye mva i Butare njya i Rwamagana.Nari ntaragerayo gusa nari mperekeje umuntu wari ufite inshuti ye yari Superefe i Rwamagana”.

“Twari mu mwaka wa 1997 baherukana mbere ya 1990.Tugezeyo burya Imana igira gahunda kandi inzira z’Imana si nk’iz’abantu,Bibiliya iravuga ngo nzi ibyo nibwira kubagirira si ibibi ahubwo ni amahoro.Mpageze ndarwara banjyana mu bitaro byaho bambwira ko nzagaruka ku wa mbere abaganga bahari bakamvura.Ku wa mbere baranzana bampimye bambwira ko ndwaye maraliya bampa ibinini banambwira ko bidakomeye ko nkwiye gusubira mu rugo”.

“Ngeze mu rugo bya binini bampaye numva biramvanze ,urumva nari maze icyumweru nsinda,ndya nabi ,naniwe nananyuze za nyungwe.Ariko iyo Imana ishaka ko uhura n’umuntu ica inzira,numva ubwenge burazengurutse,nakwicara nkumva burazenguruka,nareba nkabona inzu ziragenda.Mpamagara umugore wabaga aho muri iyo nzu nti ngwino nkubwire amakuru yanjye ,ntangira kwatura.Umugore yagize ubwoba arampunga ajya kuri telephone ahamagara ku bitaro bya Rwamagana ngo bamwoherereze Ambulanse kuko umuntu amupfanye”.

“Ambulanse yaraje ikigera ku muryango mba ndakize  bya bintu bizenguruka biba birahagaze,nanga kujya muri iyo modoka bati niwanga kuyijyamo baravuga ko urwaye Celebrale,njyamo bangeza kwa muganga ntazi icyo ngiye kumarayo.Banshyize mu cyumba banshyiramo Serumu ariko Imana yagambiriye ibindi.Wa mumama arambwira ngo asubiye mu rugo kuzana amashuka ,akigenda numva umuntu arakomanze ,ndavuga ngo mwinjire, hinjira abana babiri b’abakobwa biga mu mashuri yisumbuye baravuga ngo Imana yadutumye kubwiriza umuntu uri muri iki cyumba,ndababwira ngo ese muvugana n’Imana  bati “cyane”,nti “none se umugore nari ntangiye kubwira ibyanjye ntabyumve mbibabwire” bati “yego”.

“Abana baranganije baranyatuza bambwira icyanditswe kiremereye  ngo “wa musore we ujye wibuka umuremyi wawe  iminsi y’ubusore bwawe ,iminsi mibi itaraza ubwo uzaba uvuga ngo sinejejwe nabyo”.Barahaguruka baragenda ,bakigenda hinjira undi mugore wari uvuye guhinga mu murima arambwira ngo Imana intumye kukubwiriza !Ndamubwira nti hari abakobwa bavuye hano kumbwiriza mwaba mwari mwavuganye ” !

“Arambwira ngo ntabazi,nti none vuga nawe nkumve,maze ahera ko asoma cya cyanditswe abana bari bansomeye ,mpita mvuga nti ndapfuye !Kuva uwo munsi nasubiye muri Kaminuza ntanga ubuhamya.Iby’ivugabutumwa sinzi uko byaje ariko byatangiriye mu gutanga ubuhamya mbabwira ngo icyo nzi ni uko nari umupagani,meze nka ya mpumyi yavuze ngo icyo nzi ni uko nari impumyi ariko ubu ndabona” !

Dr.Bishop Fidèle Masengo  akaba ari umuyobozi w’Itorero Foursquare Rwanda akaba yarananditse n’igitabo cyitwa Intimacy with God  gikubiyemo ubutumwa buvuga ku busabane hagati y’abemera n’Imana.

You may also like

Leave a Comment